Gezond verstand,

Met pien in mien harte zie ik hoe elke keer de mens zwicht veur geld. Nu mot ik ook zeggen, geld is heerlijk en völle geld nog völle better. Geld is vrijheid.  Geld is macht. Maar geld is ook iets wat oe kapot kan maken. Als i-j ’t niet hebt bijveurbeeld. Dan kön i-j d’r an onderdeur goan. Oe mooie leaven, geet dan zogezegt noar de kloten deur ’t geld. I-j könt dan op ’t slechte pad komm’n. i-j goat bijveurbeeld  een gewapende oaverval doen met een knappertjespistool van oe kinder op ’n lingeriezaak , zodat i-j eindelijk weer een schone onderbokse an könt  of bi-j de plaatselijke bakker jat i-j een paar stoete, zodat i-j dan wat te vretten hebt en dan oe honger veur effen gestild is.
An luxe kön i-j gauw wennen . I-j zoept duurdere wi-jn of koopt dure merkkleding, koopt een luxe sportauto van 275 pk’s om doarna noa 5 minuten  met 150 tegen ‘n boom an te knapp’n. Maar hept dan wel de poen om de ziekenbroeders om te kopen om oe een extra rondjen te loaten rij-en in de ambulancewagen. Geld is iets aparts, wanneer heb i-j d’r genog van. Op ’n gegeven moment is ’t toch ook gin zak an als’i-j d’r zovölle van hebt, dat i-j van narigheid niet weet, wat i-j d’r mot van kopen. Geef  i-j ’t dan an goeie doelen? Krieg i-j ineens zovölle vrinden omdat i-j zovölle geld  hebt. Da’s gin vrindschap, da’s omkopen. Als i-j de loterij van 10 miljoen wint. Word i-j dan gelukkig? Joa veur efkes wel. Maar doarna zit i-j nog wel zelf tegen oe eigen rotkop an te kieken, maar dat hoeft tegenwoordig ookal niet meer. Doar bûnt ook weer dokters veur die oe hele gezicht veur völle geld kunt umbouwen. Wat wil ik, Boer Kloete, nu zeggen met dit gezwam um  geld.
Probeer met oe eigen gezonde verstand, gezond um te goan met de financiéle middelen die i-j hebt.  Kiek niet noar een ander, wat een ander hef en kan. I-j könt d’r niet binnenin kieken. Ze könt wel kats ongelukkig wezen en ’t touw al wel op zolder hebben hangen om te wachten op ’t goeien moment. Ze könt zich elke week wel noar de blixem zoepen en kroepent noar huus hen goan um doar uut te janken bi-j hun lelijke deerne vergetten könt.