Als ik disse collumn typ, is ’t eind Mei, ’t regent, ’t is kold en de was dreaijt in de machien. De hond lig op de banke en ‘k luuster noar muziek van Johnny Cash. Meestal bun ik best een optimist, stoa positief in’t leaven. Maar soms zit ’t tegen. En als ’t echt tegenzit word ik hellig, maar disse keer bun ik niet hellig, maar somber. Somber um ’t somber zijn. Soms denk i-j dat i-j al zo veul stront al hebt gehad, dat i-j denkt nu zal ’t wel wat better goan. Maar, NEE, dan krieg i-j d’r nog ’n bult aalte oaver hen. En dan löp de putte oaver. D’r is elk joar een moand en iedere week is d’r weer een week. En zo een dag veur iedere andere dag. En voordat i-j ’t deur hept is d’r weer een heel joar noar de kloten. Ik denk wel ’s als iedereen zijn bek ’s houd , wat zal ’t dan lekker rustig weazen. Misschien bun ik nu een ietwat negatief en dat wil ik helemaal niet wezen, want iedereen is al negatief en als iedereen negatief lult, goat wulle met z’n allen noar de …kloten !!
Mensen um mie hen zegt, dat ik an vakantie toe ben, maar bi-j mie is ’t probleem; dat ik bi-j vakantie ’t thuuskomm’n ’t mooiste vind, dus woarum zal ik in godsnaam van huus af goan… Tjeempie , ik liek wel ’n old wief, met dit geklaag, ik hoef alleen nog gin inlegkruuske in. Van geld uutgeven, word men gelukkig, heur ik wel ‘s, maar als i-j tegenwoordig de prijzen ziet in Horeca, warenhuus of Sexshop (woar ik natuurlijk niet kom) en mien bankrekkening bekiekt , dan word i-j doar ook depressief van. Is d’r disse keer dan helemaal nix positief te melden.
Jawel, mien kanarie hef jongen. Bökkers hef ’n nieuwen cd, Dût Ow Deugt hef een heuse videoclip opgenomen bi-j hun allereerste single ; minne poeter. De schade an mien auto valt toch met te vallen en the Eagles goat promoveren. ’t Gras is bi-j de buren toch echt niet gruuner dan bi-j mi-j en mien bier is nog lange niet op. Als dat allemaal niet donders goed nieuws is en als i-j nu niet uut ow midsommerdip komt, dan wet ik ’t ook niet meer.
Zoept met mekander ’n kiste bier leug bi-j d’n barbeknooi, goa vri-jen met ow partner in’t hooi, verget ow zorgen en bid veur ’n bettere morgen. Hoe duuster ’t vandaag is, hoe harder ’t zal onweren en noa regen kump nog vûlle meer regen…en zonne…
Goedgoan en Amen