Achterbakse klootzakk’n.

In ’t leaven wat i-j en ikke probeert zo leuk en mooi mogelijk te leaven  en in te vullen, heb i-j te maken met allerlei kearls en wiefe. Soms heb i-j deur hoe bepaalde mensen bûnt. Soms kom i-j doar vûlle later pas achter. Sommige leu lult achter oe  rugge om oaver oe.  Dat könt collega’s van oe werk weazen, oe buren of oe sportmoaten in de sportschool. Achterbakse klootzakk’n , noem ik die bij disse maar effen. Sommige leu nuumt zich vrienden, maar of dat dan ook echte vrienden bûnt vroag oe dat maar ’s af.

Bûnt dat vrinden omdat ze echte vrinden bûnt en echt om oe geeft en ’t beste met oe veur hebt. Die oe helpt als i-j in de stront zit en woar i-j met könt proaten oaver de dingen die oe bezig hold. Of bûnt dat van die vrinden die ’t liefst al oe bier opzoept, oe de portemonnee ’t liefst uut oe achterzak weggapt of oe deerne ’t liefst een keer goed te grazen nemt. Soms kom i-j doar na joaren pas achter. ’N Groot deel van onzen bevolking hept gin ene kloot’n veur mekander oaver. In de groot’n stad is dat helemaal verschrikkelijk. Doar kent ze de noasten buurman of buuf al helemoal niet. Ze zegt mekander gin goeiendag en buurtvisite kent ze ook niet. Ze gooit nog liever de roeten bi-j mekander in, dan dat ze ’n goeien joint bi-j mekander rookt.

Bi-j ons op’t platteland kent ze nog burenplicht, loat ze olde vrouwtjes nog veurgoan bi-j de kassa, helpt ze bi-j koekalverij of leent ze mekanders fietse en  kent ze nog ’n verenigingsleaven woar ze soms met mekander de mouwen opstroopt om tot groote daden te kommen, zoals de papieractie’s van muziekverenigingen of stroatwerkzaamheden bi-j een clupgebouw. Disse dingen in’t leaven mot i-j met mekander koesteren en trots op weazen, dat disse dingen in disse tiet van altiet drukte en hoast nog könt. In disse tiet dat mensen het licht in mekanders ogen niet gunt, mekanders geluk niet gunt, en mekander de ergste ziektes gunt ,woarvan  ik ’t bestoan niet eens van wist.

In disse tiet, in de 21e eeuw, woar niet alles vanzelfspreekend is, leer i-j de mensen goed kennen. Dan leer i-j pas wat i-j an bepaalde mensen hept en komt hun ware aard noar boaven dri-jven. Kiek goed om oe hen met wie i-j te maken hept en met wie i-j wat te maken wilt hebben. Goa als het kan oe “echte” vrienden niet uut de weg  en probeer soms als ’t mot een luusterend oor te wezen veur ow vrienden, ookal vind i-j ’t vaak maar een bult gedram en genöhl.

Ik, Boer Kloete zegt oe allen; goedgoan en Amen